Fertugasta og fimmta þingi ASÍ verður framhaldið í vikunni. Það fer fram 27.-28. apríl; fimmtudag og föstudag. Þinginu, sem fer fram á Grand Hótel í Reykjavík, var frestað 14. október síðastliðinn eftir miklar deilur.
Á þinginu verður framtíð vinnumarkaðarins tekin fyrir, jafnrétti og menntun, kjaramál, lífeyrismál og húsnæðismál, svo fátt eitt sé nefnt. Dagskrá þingsins í heild má sjá hér.
Ljóst er að ný forysta ASÍ verður kjörin á þinginu en Kristján Þórður Snæbjarnarson gefur ekki kost á sér til áframhaldandi setu. Finnbjörn A. Hermannsson hefur lýst yfir framboði til forseta. Hann er úr röðum iðnaðarmanna og lét af störfum sem formaður Byggiðnar – félags byggingamanna um mánaðamótin.
Í tilkynningu sem Finnbjörn sendi fjölmiðlum, þegar hann tilkynnti um framboð sitt í liðinni viku, segir hann meðal annars: „Ég bý að áratugareynslu af margvíslegum trúnaðarstörfum innan verkalýðshreyfingarinnar og hef ætíð verið talsmaður samvinnu og sátta. Ég vil leggja mín lóð á vogaskálar þess að verkalýðshreyfingin rísi undir ábyrgð sinni á erfiðum tímum, og standi vörð um kjör vinnandi fólks og sæki fram fyrir bættum lífskjörum okkar allra. Með því að stilla saman strengi í gegnum sterk og öflug heildarsamtök getur verkalýðshreyfingin knúið á um raunverulegar kjarabætur sem halda til frambúðar.“
