![Óþreyja í samninganefndum Fagfélaganna](https://matvis.is/wp-content/uploads/2024/02/samninganefndir-fagfelaganna-15.-feb.2-scaled.jpeg)
Samninganefndir Fagfélaganna (MATVÍS, VM og RSÍ) hafa gefið fulltrúum sínum við samningaborðið 10 daga frest til að ná saman við Samtök atvinnulífsins um nýjan kjarasamning á almennum markaði. Hafi aðilar ekki komist að samkomulagi að tíu dögum liðnum munu samninganefndirnar hefja undirbúning aðgerða.
![](https://matvis.is/wp-content/uploads/2024/02/dscf7974-1024x683.jpg)
Þetta var niðurstaða hitafundar samninganefnda félaganna þriggja í Húsi fagfélaganna í hádeginu í dag, 15. febrúar. Þar kynnti Benóný Harðarson, forstöðumaður kjaradeildar Fagfélaganna, stöðu mála í samningaviðræðum við SA.
Að kynningu lokinni tóku við líflegar umræður, sem fóru langt fram úr tímaáætlun. Ljóst er af þeim umræðum að þolinmæði fyrir árangurslitlum samtölum við samningaborðið í húsakynnum ríkissáttasemjara er á þrotum. Bent var á að mánuðir séu liðnir frá því samtalið hófst.
![](https://matvis.is/wp-content/uploads/2024/02/dscf7963-1024x683.jpg)
Samninganefndirnar hafa í ljósi þessa verið boðaðar til annars fundar föstudaginn 23. febrúar, eftir 8 daga. Verði ekki útlit fyrir að samningar takist þá helgi, hyggjast samninganefndir MATVÍS, VM og RSÍ leggja á ráðin um undirbúning aðgerða til að knýja á um nýjan kjarasamning.
Fagfélögin funduðu með SA hjá ríkissáttasemjara í gær, miðvikudag og í dag, fimmtudag.
Kjarasamningar runnu út síðastliðin mánaðamót og eru lausir.