Óhætt er að segja að íslenska kokkalandsliðið hefji keppni á ólympíuleikunum í Suttgart af krafti. Liðið gerði sér lítið fyrir og vann til gullverðlauna í fyrstu keppnisgreininni, sem fram fór í gær.
Keppnisgreinin í gær kallast Chef’s table en þá framleiða liðin sjö rétta matseðil fyrir tólf gesti. Í dag fer fram keppnisgreinin Restaurants of nations, sem er þriggja rétta kvöldverður fyrir 110 gesti.
Fram kemur í tilkynningu að góður andi sé í hópnum eftir gærdaginn. „Íslenska kokkalandsliðið samanstendur af reynslumiklu keppnisfólki og einstaklingum sem flest eru að fara að keppa á sínu fyrsta stórmóti. Liðstjóri Kokkalandsliðsins í ár er Ísak Aron Jóhannsson. Ísak hefur verið í landsliðshópnum síðan 2019. Snædís Xyza Mae Jónsdóttir er landsliðsþjálfari hún var liðstjóri í landsliðshópnum sem náði þriðja sæti á síðustu Ólympíuleikum árið 2020 en það er besti árangur Íslands til þessa.“
MATVÍS fjallaði ítarlega um undirbúning landsliðsins á síðunni hér á dögunum. Liðið hefur æft af kappi í Húsi fagfélaganna undanfarnar vikur og mánuði.